بتاخدي أيه ؟!

بتاخدي أيه ؟
بتاخدي ايه ... رغم حبك .. حب عمركِ إللي حسيتي لقيتيه معاه وفيه
بتاخدي ايه؟
عايشة حالة لوحدك فيها .. تحبي..تحلمي..تنتظري ،عايشة حكاية خيالك بس إللي واهمك إنه فيها
متخيلاه إنه معاكي ... وهو له عالم تاني عايش فيه
بتاخدي أيه؟
عايشة بتدوري بين كلامه .. بين حروفه علي حاجة حلوة ، لفظ يتقال تبني ألف وهم عليه
بتاخدي أيه؟
من عشق جواكِ لوحدك ...عايشة ولا علي راحتك ، خايفة كلمة تطلع منك في حوار عادي تفقدك وجوده ...في علاقة أساسها الراحة في أي فعل بيصدر ليه
بتاخدي أيه؟
من دموع محبوسة بتخافي تنزل منك كل ما جرحك فيحس إنك رافضة معاملة رغم وجعها بتخافي تقولي  عاملتني بيها ليه
بتاخدي أيه؟
عايشة عذاب بحث متواصل ...ضوافرك أتكسرت مالحفر في تدويرك عنده علي نقطة مية تروي ظمأ وعطشك بيه
إيدك ألتهبت من جذب وشد وهو بيبعد وهو ولا همه تمسكك بيه
بتاخدي أيه سؤال عمرك ماخيالك صورلك من يوم ماعرفتيه يجي يوم تسألي نفسك بيه
بس لو جه السؤال في بالك اعرفي إنك خلاص تعبتي .. خلاص سلمتي
لازم تسيبي الحبل... إيدك خلاص مش حمل تتمسك بيه
ماهو خلاص ...هتاخدي أيه؟

البداية

البداية بتبقي دايماً جميلة
أجمل حاجة في كل حاجة هي البداية
بداية معرفتك بشخص بتكون أجمل لحظات مرت بيك معاه
حب البدايات مش بيجي من فراغ...حب البدايات بيتحس بعد فقدان الإحساس بجمال اللحظات الأولي في حياتك مع الشخص إللي حبيت البداية معاه
الحنين للبداية بيزيد كل لما  بتحس بجفا او قسوة أو بُعد
بتحس إنك مفتقد أوي الأحساس بالأيام الأولي ، وأول كلام  بينكوا
شدة إرتباط أي أتنين ببعض ممكن تخليهم يحاولوا يعيدوا البداية سوا.. بس لازم تكون دي رغبتهم  هما الأتنين.. غير كده ممكن يبقي حب البدايات المقصود بيه  حب بدايات مختلفة...متكررة مع أشخاص تانين
فرق كبير بين إللي بيحب حد فيتمني يعيد ويعيش كل لحظة حلوة معاه خاصة البداية... وبين إللي بيحب البدايات عموماً وبيحب يعيشها مع أشخاص مختلفة حتي لو كان في كل مرة كلامه وأحساسه بيكون واحد
لازم تعرف إنت اي نوع فيهم وتعرف الطرف التاني حابب يعيد البداية معاك ولا بيحب البدايات الجديدة مع حد جديد
كل يوم مع إللي بتحبه ممكن يكون بداية تعيش فاكرها وتستمتع بيها كل مرة بتعيد أحساس لحظاتها...بشرط تساوي الرغبة في اعادة البداية بين الطرفين وإلا ساعتها هتكون دي بداية النهاية
أي بداية جميلة لايمكن يتقال عليها جميلة لو كان ليها نهاية
فالبداية بتكون جميلة ...وبتفضل جميلة لو مكانلهاش نهاية
كل قصة حب حلوة بين أتنين بتبقي بداية مالهاش نهاية
 بداية الحب أجمل بداية مالهاش نهاية
الحب بداية

الحب راحة

الحب راحة
مش مطلوب منك بذل أي مجهود أو تحس إنك في حرب علشان تخلي حد يحبك...هو يحبك كده زي ما أنت ، وإن الطرف التاني يحس معاك بنفس الشئ ...ويحسك حاسس بالراحة دي
الحب راحة
إنك تعيش مرتاح وإنت حاسس بالأكتفاء، وإنك عمرك ماهتكون في مقارنة مع حد، وإن الطرف التاني نفس الشئ مكتفي بيك ومرتاح
أي شعور غير إنك تكون مرتاح ،متطمن ..حاسس بالأمان مع حد يبقي إللي أنت فيه أسمه عذاب..مش حب
أول لما تحس بالراحة إتأكد وقتها إن ده الحب... وليس العكس
الحب لازم يكون متبادل علشان الأحاسيس تكون متساوية ...متبادلة
علشان وقتها فعلاً تحس بالراحة فتحس بالحب
فالحب ... راحة