شهريار

‏شهريار بيمثل رجالة كتير
هو كان بيقتل أي ست بعد ليلة معاها ...لما بيوصل لأخرها وشهرذاد حاولت تخلي عنده شغف علشان عمرها يطول معاه
البعض لما بيعرف وبيوصل لأخر الست بيقتلها
‏والعيب مش في الست هنا .. لأ العيب فيه لأنه مش سوي ومش مطالب منكِ تعيشي  حياتك في ضغط عصبي لأرضاءه او لتطويل حياتك معاه
ده شخص غاوي تغيير الحياة معاه لازم يكون لها سيف مسرور اللي هيقطع بيه معاكي...فأبعدي وانفدي بحياتك
وحبي راجل

الزمن بينسي

كلمة ممكن تتقالك بكل بساطة من حد كنت بتحاول بكل الطرق تصالح بيه الزمن
حد كنت شايف بزمنه هتمحي زمن كله أوجاع
بس بيقولهالك ببساطة بعد لما فوقك من وهم عمله وعاش زمن محسسك بأنه جنبك  ونهاه بكل بساطة  وكأن عادي وبسيطة
أزاي تموت كل يوم علشان حد عايش حياته فترات بسيطة أنها تخلص والزمن ينسي زي ما قال
أفضل فاكر الكلمة وحطها جوة عينيك "الزمن بينسي" علشان  تفضل فاكر إنك كنت حاجة وعادي خلصت عند حد عادي بالنسباله إنك ماتبقاش موجود  ...و الزمن ينسي
لما تخلي حد يحبك لدرجة الإيمان بيك وبكل كلمة بتقولها ويمشي عليها بيقين تام إنها الصح أعرف إنك لما تقوله عادي أحنا مش مع بعض وهتنسي والزمن بينسي إنه من إيمانه بيك هيصدق وهيطمن إنه هينساك زي مانسيته ببساطة وإن فعلاً...الزمن بينسي

مافيش سبب

‏ممكن مايكونش في سبب لحبك لشخص معين ،بس لو مافيش سبب يخليك تكمل حبك ليه هيبقي واحد من اهم الاسباب أنك تبطل تحبه
جملة واحدة من كلمتين ممكن توصف بيهم ليه حبيت حد وليه بطلت تحبه
مافيش سبب

أوعي

‏اوعي دموعك تنزل قدام راجل إلا لو متأكدة إنه  هيمسحهالك وهيمسح اللي نزلهالك من بالك... فيبقي كأنه
مسحه من الدنيا.. ومينزلهالكيش  هو ابدا
‏أوعي تعري روحك لراجل الا لو متأكدة إنه هيعيش باقي عمره وعمرك يسترك ويقويكي..بدل مايجي عليكي وقت تحسي ان تعرية جسدك كانت هتبقي اهون
أوعي

حِب

‏حب اللي تكون متأكدت إن مهما كترت أولوياته إنت أولها
مهما صغرت دايرة معارفه او كبرت أنت أهمها
اللي مهما غير فحياته إنت ثوابتها مايقدرش يعيش من غيرك
‏إللي تكون متأكد إن مهما قلبه أتغير مايتغيرش من ناحيتك
إنه يكون بيدعي لمغير القلوب إنه يثبت قلبه علي دينه..وعلي حبك ..مش عايش يثبت انه بيتغير
‏إللي تكون إنت نَفَسه ونفسه...يموت لو معاش بيك وليك

كن فيكون

مش كل راجل يقدر يحسس الست بأنوثتها ، ويحيي جواها حاجات هي متعرفهاش
مش أي راجل يعرف يخلق ويقول لحاجات جواها كن فيكون ...مش أي حد
مش أعتماد علي خبرة راجل ، ولا علي قوة تأثيره
مش مسألة جاذبية ولا حلاوة كلام...العبرة بأحساسه هو ، بشعور يبقي نابع من جواه
الست مهما كانت محتاجه لأحساس وكلام مختلف ،مهما كانت وحيدة ومهما سمعت من كلام حلو عمره م هيخلق جواها مشاعر إلا لو حست معاه بأفعال تخطفها
كل ست مهما كبرت محتاجة لخالق يخلق  ويكوّن مشاعرها
كل ست بتعيش مستنيه إللي يقول لرغبتها ومشاعرها كن...فتكون

معلش

معلش

كلمة بتتقال في أوقات كتير كرد علي فضفضة  أو كمواساة لحد حزين 

في كتير بيرفضوا وبيكرهوا الكلمة دي وممكن يكون لهم رد فعل عنيف لما يسمعوها

في بيكون عايز رد فعل مادي ينهي اللي بيمر بيه مش مجرد كلمة

بس بالرغم من كره البعض للكلمة

بالرغم من إنها كلمة بسيطة أوي ألا أنها ممكن تكون بكل حاجة 

كلمة عدد حروفها قليل بس بتقول كل حاجة

ممكن تتقال في وقت بتكون فيه وصلت لمرحلة خلاص كل الدنيا ضاقت في وشك

ممكن تكون محتاج كل حاجة وعارف أن ماينفعش خلاص تاخد اي حاجة بس الكلمة دي تحسسك بالراحة 

معلش

معلش ممكن تكون عكاز تتسند عليه وانت مش قادر تخطي خطوة خلاص لوحدك

ممكن تكون إيد أتمدلك تمسك إيدك وتمشي معاك طريق  خايف تمشيه لوحدك

إيد مش هتعمل ولا هتحل حاجة بس هتمسكك وتكون معاك

معلش

معلش ممكن تكون حباية المسكن لشخص مريض وبيتألم من مرض مالوش علاج  بس معلش دي هي اللي هتخليه يتحمل الألم

معلش 

معلش ممكن تكون شخص ربنا بعتهولك وسط تعب الدنيا يخليه جنبك...وجوده بس يحسسك أنك مش لوحدك في الدنيا

شخص جالك في ضلمة العالم  ووحدتك علشان ماتخافش 

كلمة ممكن لو تسمعها تعرف تتنفس أن حد حاسس بألمك ومافيش في أيده يقدمهولك غير الكلمة دي اللي بتحس كل احساسه بيك فيها

معلش

كلمة فيها حضن...فيها طبطبة 

 فيها أمان ...سلام

كلمة بكل حاجة

معلش